Genesis 41

Yóoseefaafa Faraoona qainá óosana kooroou úfafa.

1Qaara aukuana áiqaróofanoo moó éendaki Isipa máqannaa karaambáiqa Fáraoofa moó qaína maaqímmasee qáfee feé qinau. 2Qineé Niru nammmári áfainni kikíqiqa márida qáfaunanoo qísauku dínni taikásee dinni ani qaara marasée 7 búrimakau nifaaqa faqáasa ururéeqa ándanda née máriafaqa qáfeeqa. 3Néemarufaqa dínni qísauku taikásee dínni óonu qaara marasée 7 nímudaani ánaaqi nammárikíqari ururéeqa indaarú qáasa naaqá nammári áfainni kikíqamma fuafaqa qáfeeqa. 4Nímudaani ánaaqiuqa nifaaqa faqáasa aiqáma nambíqama saafaqá qáfeeqa. Mi ainaináusa qainásaa qáfamáseenoo karaambáiqa Fáraoofa tautí fíndifinau.

5Mifa kaifáa áfuki qaunduarufanóo faifufanóo moo qáininau. Sakumma moodáa óosana sáa dínni qísauku taikásee dínni óonu qaara marasée 7 íranoo márufa aiqáma ánoona qumbi qumbiqírafa márufanoo qáfanau. 6Kafáa miná ánaaqianna moó qaína qáfoofanoo dínni taikásee dínni ani qaaraqánda marasée 7 sakumma moodáa óosanasaa íranoo márinau. Ánoona síaifa nárana maaqína kínaafa mandáikirafa sía ánoona márufa, úfai fánnoo raudáqoo fára foorá márufanoo fífau ákee kai márinau. 7Ánoona siai sakummáfa quándáku fánoo ánoona faqáa sakumma aiqáma námasanau. Mi qainná máseenoo Fáraoofa tautí findi fufanóo Bóo moó qaínammidaqee qinau.

8Mi kananaanná Fáraoofa fíndi fufanóo moómoo írirana mároosia Isipa máqannaa írirana faqáasa faqa afunee fásiqauqa faqa náaranau. Náaramaseenoo nari qaínuna qímannimufaqa sía moó fánnoo amana miná óosana narí qímamiqau.

9Minára tutu qídaqa randée márufanoo Fáraoona úainna tatí máru fasiqáfa Yóoseefaanara iriséenoo Fáraoona qímaminoo qinau. Óo karaambáiqa maqee káì qeeqá fúrufariafánna óosanna óonu máfi iriséeqa kooroommásee qímamidaqa. 10Óoqai anée áanoo qímaseenana qiní fáqa féemu suqée marúna fáqa aneenná sundía rakísirana máaqaki quqáqisanau. 11Moó éendaki maaqandá qainá qíqiafana. Mi qaina qandá náadu naadú óosana faqáa qaína qiqau. 12Minakína Qeeburu máqannaa kumaaraá moó fánnoo, sundía rakísirana Póotifaana aináinira fáiqi márufa maasá faqa márinau. Maasá qeeqá qainá qímamiafananoo mifá miná óosana maasá qímaqiminau. 13Mifá qundée kaímminau. Anee qiní saikáki kaifáa mara quqáqiseenana féemu suqée máruna dírinau.

14Fáraoofa mi ufána iriséenoo niqiqoofaqa Yóoseefaana karabúsa kínaana aaqee uqanná áfiqee ániqau. Mifa óosau suqaséenoo narí qamunna fúka afisúmareenoo Faraoona áfusaa aniranau.

15Aniroofanóo Fáraoofa qímaminau. Qinée qainámmásaunaqa sía moó fánnoo miná óosana qímaqimia faqa íriqa. Anée qainá óosana kooroo qímarianafa máriannanara qímaqimíafaqa áaraidaqa.

16Miqí qufanoo Yóoseefaafa qinau. Óo qiní úriqararafa ámiqirafa qinée qeeqá kai sía amanaíkianáuranoo. Ánutufa kaí qainá óosana qímannimirana qíminaqa qímamíanaura.

17Miqí qímasoofanóo Fáraoofa narí qainá óosana Yóoseefaana maaqí qímasee qímaminau. Qainúnnana qinée Niru nammári áfainni kikíqiqa máridaqa qáfeeqa. 18Qáfaunanoo burimakáu nifaaqa faqáasa dínni qísauku taikásee dínni óonu qaara marasée 7 nammárikiqari ururéeqa ándanda néemariafaqa níqafeeqa. 19Misá nínaaqianna miqí kaimmáseeqa dínni qísauku taikásee dínni óonu qaara marasée 7 misá nimana kái nímudaani ánaaqi ururéeqa kikíqamma fuafaqá níndafeeqa. Miqíra mandáikira burimakauqa sía óoqai Isipa máqa máaqaki moótinai máriafaqa qáfeeqa. 20Nímudaani ánaaqi burimakauqa nifaaqa faqáasa námataikéea. 21Nambíqamaseeqa sía moó fánnoo nifaaqa maréea, óoqai máriùndee kai miqá máriafaqa qáfeeqa. Nindáfamáseeqa tautí fíndi fiqa.

22Qinée moó qaína faqa másee qáfaunanoo dínni qísauku taikásee dínni óonu qaara maraséenoo 7 sakuma aiqáma qumbi qumbiqírafa moodáa sáqarisaa márifaqa qáfeeqa. 23Miná ánaaqianna qáfaunanoo kafáa moó sákuma sáqarisaa dínni qísauku taikásee dínni óonu qaara maraséenoo 7 íranoo márifaqa qáfeeqa. Mifá ánoona síaifa úfai úqinoo raudá quqáqai fára foorá márifaqa qáfeeqa. 24Ira fifaqá qáfaunanoo ánoonna síaifa indaarú íraina ánoona sakumma nambíqamasaafaqá qáfeeqa. Qinee mi qainnána afunee fásiqauqa qíma nímunaqa sía moó fánnoo miná óosana qímaqimia.

25Yóoseefaafa miná qainá ufa iriséenoo Fáraoona qímaminoo qinau. Anée qainíannana óosana moodáara qaaraqánda qaína íananoo. Ánutufa áuqaanínna áinainnara qainásaa aní qímaminoo. 26Dínni qísauku taikásee dínni óonu qaara marasée 7 burimakáu afaaqa faqáana qáfaannana óosana dínni qísauku taikásee dínni óonu qaara marasée 7 aukuana qáfaananoo. Sakumma dínni qísauku taikasee dinni óonu qaara marasée 7 sakuma ánoona qumbi qumbiqírana faqa qáfaanafa mifá faqa miqíkai ínoo dínni qisauku taikásee dínni óonu qaara marasee 7 áukuana máridanoo. Mi qaina qandá óosana moodáa máridanoo. 27Dínni qísauku taikásee dínni óonu qaara marasée 7 burimakau nímudaani ánaaqi nammáriki ururaasá faqa dínni qísauku taikásee dínni óonu qaara marasée 7 sakuma ánoona síaina qáfaannana óosana 7 aukuanaki aandaroo firaafá máriannoo.

28Qinée qímamúnandee kaimmíannoo. Ánutufa narí áuqaanínnanara aní uqafíqeenoo. 29Dínni qísauku taikásee dínni óonu qaara marasée 7 áukuanaki Isipa máqa máaqaki nárana firaaqóo rairaa íannoo. 30Miná ánaaqianna kafáa miqí kai ínoo dínni qísauku taikásee dínni óonu qaara marasée 7 áukuana aandaróo náruannoo. Mi aandaroonáki mi rairaaira narannára qaunífaranoo. Aandaroo fannóo maqa máaqa mandáika uqanna másaannoo. 31Mi aandaroo aukuannái faiqí ánaasee dóo rairaaíra áukuanara qaunú uqannáséefáranoo. Aandaroo firaafá mandáika uqanná írafa márianínnanara miqífaranoo. 32Anee kaifáa kaifáa qainíannana óosana Ánutufa mi ainainná kásooaqee kúqaa miqíannoo.

33Minára anee aneenná máqannaasakína moó qáfamaseenana írirana faqáa fásiqa mara quqásainanóo mifá Isipa máqa máaqasáa rakísiani. 34Anee akaqá rákisirausa quqásainaqa moodaannai qísauku taikásee dínni óonu qaara marasée 7 rairaaíra áukuanakina óosana óosana nárana moodáannai qisauku námu kínaana moodáa moodáa mara afeediaqa. 35Anée qímanniminaqa aiqáma nárana rairaaíra áukuanakinaana suqú quqáaqa. Anée afeeka ufa nimisáinaqa nárana maqúsa maqúsaki suqú quqásee minásáa rakísiaqa. 36Mi narannáfa dínni qísauku taikasee dínni oonu qaara marasee 7 áukuana aandaróo firaafa ánianínnanaki mi afeediránakínaana néefaranoo. Miqídaqa sía faiqí ánaasee kúqifaranoo.

Yóoseefaafa Isipa máqannaasa úriqararafaikinau.

37Fáraoofa fáqa narí úriqararausa fáqa Yóoseefaana íriranara eedóo qiqau. 38Miqí qímaseenoo Faraoofa qímanniminoo qinau. Maasá sía amana moó fásiqa Yóoseefaana úraaqararana paqúrianaura, Ánutuna maraquna minakí márifa márinara sáifanoo mifá kai máriani.

39Miqí qímaseenoo Fáraoofa Yooseefaana qímaminoo qinau. Ánutufa kai maa aiqamá aínainná aní uqafíqeenoo. Anee aiqámausa úrinnaaqara másee firaa irirana faqáafa akooqóo máriananoo. 40Qinée aní quqásaanana qiní maqa máaqasaa rakísinnaranoo. Aiqáma qiní faiqí ánaasee aní ufa máu kai fifáranoo. Aní afeeka fannoo qiní áfeeka ámeemaanai máriannoo.

41Miqí qímaseenoo Fáraoofa kafáa Yóoseefaana qímaminau. Qinée maqee aní maréeqee Isipa máqannaasa úriqararafái kámmiqa. 42Miqí qímaseenoo Fáraoofa narí ásauku ámukakinaa rínna firaa uriqararausa rínna máruna radúku Yóoseefaana ásaukuki quqánau. (Yóoseefaafa mi rinnánannai péennakina raaraa máseenoo papiqasáa atooqásoofaqá máaqanna máaqanna miná qáfeeqa Fáraoona rínna ákara fee qímaseeqa káaqa rufíeeqa mi papiqána sáaqaraa ufara eedóo kaí qímariqau.) Fáraoofa ámiqira qámunna afisú ámaqaseenoo kóorannai áuqira kukukakana faqa rufu ámaqanau.

43Miqímmásoofanoo Fáraoofa úriqararausa nífiqanoo nu qoosa karána Fáraoofa Yóoseefaana ámisoofanoo minásaa rakísira súndiauqa miná áfunni fídaqa maaqí qimasee fáaqaridaqa qiqau. Amaaraaqa amaaraaqa. Mi oosannánannai Yóoseefaana aiqáma Isipa máqannaasa úriqararanaikinau. 44Fáraoofa kafáa Yóoseefaana maaqí qímasee qímaminau. Qinée úriqararausa Fáraoosa qímamidaqa. Sía amana Isipa máqannaa fásiqa moó fánnoo narí áidiranannai moó áinaina áuqaannoo. Mifa anísaa naaree iráannoo. 45Miqí qímaseenoo Fáraoofa Yóoseefaana fúka áuqu réenoo Safeenata Paneeaneé qinau. Miqí qímasee mifa Yóoseefaana ánaasee áminau. Mi anaaseená áuqu Aseenata námmarifa Pootifeerana áraamuna márinau. Pootifeerafa Qeerioopoorisa máqusanaasa súani áfuara innaaru qímarusa aanáiqikirafa márinau.

46Yóoseefaafa moodáa fásiqa faqa moó fásiqa ásaukuqara taikásee 30 áukuana marasée Faraoona aináinirana óosana áranau. Óosana araséenoo Faraoona áiseenoo Isipi máqa máaqaki óonuree anirée ídanoo aiqáma átinai nímarinau. 47Qísauku dínni taikásee dínni ani qaara marasée áukuanaki Isipa máqa máaqaki nárana moómoo kambíqafi rairaá inau. 48Mi aukuanna namúnakinaa nárana irairaá una Yóoseefaafa maréeqeenoo maqúsakiaqa afeedinau. Mi moodaa moodaa maqusánaki mi maqusána fiqu fíquinoo máru máqanakinaa náranna marasée mi maqusánaki áfeedinau. 49Mi naranáusa unakíisoofanoo ooruku námmari áfaiqaraa núkudara foorá moómoo uqanna márufanoo Yóoseefaafa ásaana rusía minnísanau.

50Aandaróo aukuana sía áni márufanoo Yóoseefaana ánaaqa Aseenata námmarifa akoonaiqí qaara qandá máqanau. 51Maqasoofanoo Yóoseefaafa qinau. Ánutufa qiní dadaaqifaqá qeeqá aupúrarana faqa qeeqá qíkoona átiara íriranara faqa auníqa. Miqí qímaseenoo mifa narí indaarúqaa faiqi áuqureenoo Mannasee neé qinau. 52Kafaa Yóoseefaafa akoonaiqí moó maqaséenoo qinau. Ánutufa maa maqa maaqánaki qinée aupúrarana máree márunnanaki faiqì qíminoo. Miqí qímaseenoo mifa narí ínaaqiannaa faiqi áuqureenoo Eefaraimmánee qinau. 53Qísauku dínni taikásee dínni óonu qaara marasee 7 aukuanaki nárana irairaa ímarufaqa Isipa máqannaasa asasíufa taikánau. 54Yooseefaafa undée kai ínoo qísauku dínni taikásee dínni óonu qaara marasée irairaá íra áukuana áiqaróofanoo aandaróo kambíqanau. Aiqáma máqa máaqaki aandaróo nárinau. Isipa maqa máaqaki kaí nárana káqi márinau. 55Máriufanoo Isipa máqa máaqaki faqa aandaróo nárufaqa faiqí ánaasee Fáraoo funnái óonuree náranara fáaqarida innaaru qufanóo mifá qinau. Ínnee Yóoseefaa finnaí óonu ráifanoo mifá ínnandée ínnandée kaí iaqa. 56Aandaróo firaafá Isipa máqa máaqaki aiqáma átinai firaaqóo nárufanoo Yóoseefaafa aiqáma afeedíra maqauqa atúqasoofaqa Isipa máqannaasa nárana feefaurí máriqau. 57Aiqáma máqa máaqaki máru fásiqa ánaaseesa aandaróo firaafá náru faqa aiqáma átinaindari nárana feefaurírara Yóoseefaa funnái Isipa máqa máaqaki ániqau.